黃泡釣獲~~~~
今日我,肥仔, 春春同阿肥四個因為收到風今日會收風同埋前一日爆釣 , 所以決定即刻出 , 搏下有冇怪獸 !! 於是我地四個就晨咁早五點半就去到碼頭等出船 la ~~~!!
唔經唔覺 .... 經過左兩個鐘既船程 , 係早上 七點四十五分就到達目的地--黃泡 , 一個直徑約八米既大浮台 , 去到只見到一隻作業既魷魚船綁左係離黃泡四十幾米以外既地方 , 唔理咁多 la , 即刻開始作釣 , 而同船既其他釣友亦都開始逐一上泡 , 我就由於一早綁好左釣組同竿 , 所以只要一扣隻鐵板落去就可以釣 , 所以七點五十分都唔駛我就拋落我既黃泡第一竿 , 個時其他人仲上緊泡 , 都仲未上曬 d 人, 我隻鐵板係沈左大約20 米就發覺已經有魚接餌 , 即刻抽竿 , 但發覺拉力原來未 set 好 , 即刻較返好個拉力 , 當時條魚已經入緊泡底 , 拿拿聲即刻用盡力拉返佢出黎 , 狂收幾十手之後 , 原來係懵仔一條 , 大約 60cm 長 , haha , 第一竿就中魚 la , 今次仲唔有排玩 !!肥仔同春春見到咁猛料又以極快既速度開好曬竿 , 又拋出當日既第一竿, 肥仔又係即郂中魚 , 不過可惜佢呢條無咁好彩 , 俾佢埋左條鐵鏈度 , 結果......梗係斷 la , 而春春就好好彩 , 第一竿就中條黃鰭仔 , 正一衰人 , 到我既第二竿 , 拋落去約20都無就開始 jig返上黎 , jigjig下又中 , 今次呢條唔係懵仔 la , 係煙仔 , 30 秒左右就強暴佢上黎 , 5斤左右 , 企我後面既死肥仔又話中 , 又係煙仔 , 而春春又話中 , 仲要睇住黎中 , 再中黃鰭仔 , 連續兩竿都係黃鰭仔 , 有冇搞錯 , 我地中親都係煙仔 , 制唔過 ga 喎 , 再拋多竿落去再試 , 結果又中 , 憑中魚後既游法就肯定係煙仔 , 不過可惜呢條因為綁鐵板個結綁得唔好 , 結果斷左 , 真激氣 , 無左一隻 60g 既鐵板 , 即刻換過隻 28 g 落去 , 結果當然又再中 la , 又一條煙仔 , 突然望返去遠 d 既地方 , 發現原來有極多既煙仔係度打水 , 所以我就同肥仔決定即刻上泡玩 pencil ~~
衝左上之後 , 睇到出面 d 煙仔 , 鬼頭刀 等等係度打水 , 就用極快既速度換完隻 hydro pencil 落去 , 拋第一竿 , 隻假餌一落去拉唔夠兩圈就即刻打水中魚 , 又中煙仔 ... 做乜唔係鬼頭刀 ga ... 真係乞人憎 !! 肥仔亦唔執輸 , 又係第一竿就中 , 但佢要咬第三下先中到魚 , 不過呢條係正鰹 , 好食 d , 又好力 d , 到我拋第二竿 , 亦係同樣情況 , 咬兩野先中 , 真係恐怖 , 未停過咁中魚 , 仲好玩過一棵樹 , 不過可惜再拋 d煙仔已經唔再食 , 淨係係度追住唔咬, 拋多十竿左右決定換返鐵板
既然 d 魚係水面既 , 咁就唔駛用重鐵板 la , 28g 足夠 , 拋出去打水附近既地方 , 等佢沈到20幾米就開始jig 返上黎 , 唔玩由自可 , 一玩就一發不可收拾 .... 原來 d煙仔真係咁易中( 只限我咋 , 肥仔同春春因為用既架生唔o岩玩 jigging , 我就用jigging 既專用架生 , 所以佢地 .... ) , 一竿接一竿咁中 , 最高紀錄連續七竿全中 , 真係解魚都解唔切 , 到第八口終於個三爪勾開始疲勞 , 終於直勾 la ^^ , 呢個連續七八竿全中魚既情況 , 今日總共發生過三次 ^^ , 當然唔係全部上曬 la , 上魚既機會大約係8 成 , 不過企係我隔離既肥仔同春春就慘 d la , 係咁睇住我中完一條又一條 , 中魚仲易過乜 , 終於上完廿幾條魚之後 , 隻右手開始累 ... 但唔知今日 d 力係邊度黎 , 由八點一直狂拉竿到中午都仲好有力 , 俾著係平時一早謝左 ...
不過春春今日就威 d , 做左全場最大尾獎 , 用條 daiwa 65g 既鐵板中左條 80cm 5kg重既鬼頭刀 , 條鬼頭刀係咁狂跳水, 最高跳到成兩米咁高 , 精彩到極 , 睇住佢藍藍綠綠極之漂亮既身軀一次又一次咁飛出水面 , 真係第一之見 , 終於幾分鐘之後就撈左佢上黎 , 上左水仲係度不斷咁狂跳 , 真係想咁快捉得住佢都難 ~~ 因為鬼頭刀好好味 , 所以即刻放血放入冰倉 , 留返今晚食 ^^
終於捱完一日既超辛苦釣行 , 到四點半就開始執野走人 , 全日我總數中過超過 60 口魚訊 , 用左兩三成 , 但點都有過三十幾條既收獲 , 其中一條懵仔, 一條黃鰭仔, 一條正鰹(斷左一條又甩一條 , 如果唔係就有三條正鰹 gala, 而且d 正鰹好力過 d煙仔好很多ga , 各位要小心) , 而肥仔就三條煙仔 , 一條正鰹一條青磯仔同一條肥仔手板都無既章紅仔^^ , 春春就一條鬼佬 , 兩條煙仔 同兩條黃鰭仔 , d 黃鰭仔真係好仔下 .... 30cm 鬆 d , 好鬼過癮 , 而肥肥就一條鬼頭刀仔 , 一條煙仔 , 一條正鰹 , 總括今日既釣程 , 發覺一定要用jig竿同pe 線先會有最好既釣果 , 因為尼龍線有延伸性 , 拉動鐵板時會做唔出好既動作 , 而jig 竿亦可以減輕手部負擔 , 係黃泡度用 6呎或以上既就足夠 , 最緊要識得避開條魚衝返埋泡邊而係被泡邊割線 , 呢樣好重要 ~ 當然鉸既拉力值亦都要設定得比較好先得 la ~~
點擊看大圖:4.jpg
點擊看大圖:6.jpg
點擊看大圖:7.jpg
點擊看大圖:2.jpg