老馮！我諗我要移民喇！
克仔，你有無聽過：「貧賤不能移，威武不能屈」呀？
有聽過，係古語嚟嘛，意思係只要有堅定意志，即使貧賤亦都唔可以改變意志，只要意志堅定，即使更大權勢亦都唔可以令佢屈服
你個解釋已經過時喇，响今時今日，特別响澳門，意思已經變為：「貧賤不能移民，富貴人唔可畀人屈」，即係話，無錢就可以畀人屈。
正如你所講，澳門依家係有財既話事，政府一眾官員都不過係傀儡，澳門已經唔係法治，根本就係權治，所以即使無錢我都一定要移民。
澳門係權治？究竟發生咩事呀？
咪就係澳廣視囉！
澳廣視又賣咗Ｄ咩新聞令到你義憤填膺呀？
今次唔係因為佢賣咗Ｄ偏坦權貴新聞，而係畀人脅持嚟做人質，逼市民同綁匪串同，最後逼當局屈服响所謂民粹精神之下。
你講果段野好深喎，我唔係好明！可唔可以解釋吓呀？
其實係因為澳廣視早兩晚突然無得睇，而尋日澳門日報頭條竟然係：「公天停播，澳廣視無得睇，顯示存在價值，四十萬人受影響！」淨係題目已經睇到扯火，等同支持公天「脅持市民以令政府」，再加上前幾日各大報章包括訊報有新聞同評論指稱，政府對公天侵權行動就等於妨礙公民知情權，又話公天係歷史問題，更加指市民無得非法頻道睇係有違基本法咁嚴重！
你好少支持政府既行動喎，你又想謀番一官半職呀？
你唔好小人之心度君子之腹，我唔係要支持政府，我係反對澳門市民權益受損，天線公司一早已經收咗用戶錢，依家就突然停止轉播澳廣視頻道，公天公司解釋係因為澳廣視並未授權公天公司轉播，所以就停止廣播，同樣地香港四大電視台，唔通又有授權佢地轉播咩？佢地咪又係照樣轉播，其實佢地好明白，澳門人睇澳廣視主要係睇佢既新聞同特備節目，其次就係睇足球轉播，因此佢地停播澳廣視根本就係悖論，我認為今次公天事件主要由於傳媒偏坦公天，縱大公天公司個膽，對於公天已經幾年既侵權行為，當局唔處理係失職，但係過去未被檢控，唔代表將來唔可檢控，所以公天只可以要求當局設定條件合法化佢地既服務，對於侵權既就要停播，對於未違法亦未合法既灰色地帶，政府就協助佢地解決，對於有傳媒話禁止公天轉播被侵權頻道就會令市民失去資訊權，仲誇張到話違反基本法，我希望公天公司可以睇吓佢地所謂提供資訊既頻道，係咪無咗佢地，澳門市民就閉目塞聽，對於香港以至世界新聞大事，我認為香港四大頻道已經好足夠，四大電視台親政府程度亦遠遠超於澳廣視，所以我唔認同現有六個無線頻道資訊貧乏，相反，現有被公天公司侵權既頻道，其實不少只係供市民半夜收睇體育節，例如有得落注既足球賽同籃球賽。大家都知道基本法有維護市民資訊權，但係基本法同樣有保障知識產權條例，好明顯，現在違反基本係眾多公天公司先至真。
講嚟講去，今次公天事件就可以睇得出政府智慧，亦都可以睇得出權治係咪已經降臨澳門。
最後，既然一眾傳媒認為公天係歷史問題，所以政府要照顧市民生活質素，要以市民為重；點解當年豐順新邨五Ａ碼頭報道中，一眾傳媒又唔以歷史問題嚟勸導政府照顧市民，搬走商人一方利益既五Ａ碼頭？反而要求市民要默默承受呢？不過兩次事件都有一點相同，就係傳媒都係企响大商家嗰一方，一眾傳媒有幾公正不阿，可見一班。
作為澳門日報，除咗上面既頭條報導，其他既事件更加罄竹難書！
你講開我先講咋，汪主席公開焚燒澳門日報其實有佢既大道理！今日傾到呢到先，下次再傾！
公天機構逼巿民 地位超然似是神 當局進退顯無能 巿民受害實不幸
轉自<澳門訊報>
